前東華三院主席周振基兒子周博軒與已故影星柯受良的女兒柯立珍婚宴，前晚於四季酒店舉行，張學友獨自出席，他與太太一向是令人羨慕的一對，但問到「過兩招」夫妻相處之道給一對新人時，他反而客氣表示仲學緊，白頭到老並不容易，最唔識老婆。
周博軒與柯立珍婚宴前晚於四季酒店筵開三十五席，嘉賓雲集，包括何志平夫婦、劉坤銘、傅明憲、曾志偉、張學友等到場。張學友沒有太太陪同出席，他謂太太甚少去飲宴，忙於在家中湊小朋友，他又表示看柯立珍大，行禮當天感動得有如自己嫁女一般。
被問到有否傳授夫妻相處之道，他說：「結婚係長久盟誓，白頭到老講就容易，做就好難，依家我都仲學緊，雖然學十幾年，但比起人七十年仲差好遠，兩個人相處要互相扶持，彼此相愛，要保持有愛，我都好努力保持愛，要加油，唔係生仔，係維持一段關係要努力加油。（咁情趣呢？）呢樣我最唔掂，我唔識老婆。（太太識唔識畀番情趣你，緊父親節可能已安排好慶祝？）父親節我就唔知，可能到時最大驚喜係佢唔記得，我都要返去提佢。」
不設防造人 新郎哥周博軒被問到家長有沒有送禮給他，他開心地說：「送太太畀我已係最大的禮物。（會唔會快生BB？）我兩個都好鍾意小朋友，父母亦好想抱孫，所以會不設防，努力造人。（去邊處度蜜月？）我會去東南亞玩幾日。」
採訪：名人小組
周博軒與柯立珍郎才女貌，十分登對。
張學友結婚十幾年，仍努力學習夫妻相處之道。